یوں سجا چاند کہ جھلکا ترے انداز کا رنگ

غزل

یوں سجا چاند کہ جھلکا ترے انداز کا رنگ

یوں فضا مہکی کہ بدلا مرے ہمراز کا رنگ

سایہء چشم میں‌حیراں رُخِ روشن کا جمال

سُرخیء لب میں‌ پریشاں تری آواز کا رنگ

بے پئے ہوں کہ اگر لطف کرو آخرِ شب

شیشہء مے میں‌ ڈھلے صبح کے آغاز کا رنگ

چنگ و نَے رنگ پہ تھے اپنے لہو کے دم سے

دل نے لےَ بدلی تو مدھم ہوا ہر ساز کا رنگ

اک سخن اور کہ پھر رنگِ تکلم تیرا

حرفِ سادہ کو عنایت کرے اعجاز کا رنگ

کراچی، 1965ء

💌 Enjoyed this post? Never miss out on future posts by following us via email.