غم بہ دل، شکر بہ لب، مست و غزل خواں چلیے

غم بہ دل، شکر بہ لب، مست و غزل خواں چلیے

جب تلک ساتھ ترے عمرِ گریزاں چلیے

رحمتِ حق سے جو اس سَمت کبھی راہ ملے

سوئے جنّت بھی براہِ رہِ جاناں چلیے

نذر مانگے جو گلستاں سے خداوندِ جہاں

ساغرِ مے میں لیے خونِ بہاراں چلیے

جب ستانے لگے بے رنگیِ دیوارِ جہاں

نقش کرنے کوئی تصویرِ حسیناں چلیے

کچھ بھی ہو آئینۂ دل کو مصفّا رکھیے

جو بھی گزرے، مثلِ خسروِ دوراں چلیے

امتحاں جب بھی ہو منظور جگر داروں کا

محفلِ یار میں ہمراہِ رقیباں چلیے

💌 Enjoyed this post? Never miss out on future posts by following us via email.