سمندر میں اترتا ہوں تو آنکھیں بھیگ جاتی ہیں

سمندر  میں  اترتا  ہوں  تو  آنکھیں  بھیگ  جاتی  ہیں
تیری آنکھوں  کو  پڑھتا  ہوں  تو  آنکھیں  بھیگ  جاتی  ہیں

تمہارا  نام  لکھنے  کی  اجازت  چھن  گئی جب  سے
کوئی  بھی  لفظ  لکھتا  ہوں  تو  آنکھیں  بھیگ  جاتی  ہیں

تیری  یادوں  کی  خوشبو  کھڑکیوں میں  رقص  کرتی  ہیں
تیرے  غم  میں  سلگتا  ہوں  تو  آنکھیں  بھیگ  جاتی  ہیں

میں  ہنس  کے جھیل  لیتا  ہوں  جدائی  کی  سبھی  رسمیں
گلے  جب  اس  کے لگتا  ہوں  تو  آنکھیں  بھیگ  جاتی  ہیں

نا  جانے  ہو  گیا  ہوں  اس قدر  حسساس  میں  کب  سے
کسی  سے  بات  کرتا  ہوں  تو  آنکھیں  بھیگ  جاتی  ہیں

وہ سب  گزرے  ہوئے  لمحات  مجھ  کو  یاد آتے ہیں
تمہارے خط  جو  پڑھتا  ہوں  تو  آنکھیں  بھیگ  جاتی  ہیں

میں  سارا  دن  بہت  مصروف  رہتا  ہوں  مگر جونہی
قدم  چوکھٹ  پے رکھتا  ہوں  تو  آنکھیں  بھیگ  جاتی  ہیں

بڑے لوگوں  کے اونچے بادنما  اور  سرد  محلوں کو
غریب  آنکھوں  سے  تکتا  ہوں  تو  آنکھیں  بھیگ  جاتی  ہیں


تیرے  کوچے  سے  اب  میرا  تعلق واجبی  سا  ہے
مگر  جب  بھی  گزرتا  ہوں  تو  آنکھیں  بھیگ  جاتی  ہیں

ہزاروں  موسموں کی  حکمرانی ہے  میرے  دل  پر
وصی  میں  جب  بھی  ہنستا  ہوں  تو  آنکھیں  بھیگ  جاتی  ہیں