رہ گزر ، سائے شجر ، منزل و در، حلقۂ بام​

منظر

رہ گزر ، سائے شجر ، منزل و در، حلقۂ بام​

بام پر سینۂ مہتاب کھُلا، آہستہ​

جس طرح کھولے کوئی بندِ قبا، آہستہ​

حلقۂ بام تلے ،سایوں کا ٹھہرا ہُوا نیل​

نِیل کی جِھیل​

جِھیل میں چُپکے سے تَیرا، کسی پتّے کا حباب​

ایک پل تیرا، چلا، پُھوٹ گیا، آہستہ​

بہت آہستہ، بہت ہلکا، خنک رنگِ شراب​

میرے شیشے میں ڈھلا، آہستہ​

شیشہ و جام، صراحی، ترے ہاتھوں کے گلاب​

جس طرح دور کسی خواب کا نقش​

آپ ہی آپ بنا اور مِٹا آہستہ​

دل نے دُہرایا کوئی حرفِ وفا، آہستہ​

تم نے کہا ’’آہستہ‘‘​

چاند نے جھک کے کہا​

’’اور ذرا آہستہ‘‘

ماسکو 1964

​