ملکۂ شہرِ زندگی تیرا ​

زندگی

​

ملکۂ شہرِ زندگی تیرا ​

شُکر کسِ طور سے ادا کیجے​

دولتِ دل کا کچھ شمار نہیں ​

تنگ دستی کا کیا گلہ کیجے​

جو ترے حُسن کے فقیر ہوئے​

ان کو تشویشِ روزگار کہاں؟​

درد بیچیں گے گیت گائیں گے​

اِس سے خوش وقت کاروبارکہاں؟​

جام چھلکا توجم گئی محفل ​

مِنّت لُطفِ غم گسار کسے؟​

اشک ٹپکا تو کِھل گیا گلشن ​

رنجِ کم ظرفیِ بہار کسے؟​

خوش نشیں ہیں کہ چشم و دل کی مراد ​

دَیر میں ہے نہ خانقاہ میں ہے​

ہم کہاں قسمت آزمانے جائیں ​

ہر صنم اپنی بارگاہ میں ہے​

کون ایسا غنی ہے جس سے کوئی​

نقدِ شمس و قمر کی بات کرے​

جس کو شوقِ نبرد ہو ہم سے ​

جائے تسخیرِ کائنات کرے

جون 59

​