Go Sbko Behm Saghar o Badah Tu Nahin Tha

گو سب کو بہم ساغر و بادہ تو نہیں تھا​
یہ شہر اداس اتنا زیادہ تو نہیں تھا​
گلیوں میں پھرا کرتے تھے دو چار دوانے​
ہر شخص کا صد چاک لبادہ تو نہیں تھا​
منزل کو نہ پہچانے رہِ عشق کا راہی​
ناداں ہی سہی، ایسا بھی سادہ تو نہیں تھا​
تھک کر یونہی پل بھر کےلئے آنکھ لگی تھی​
سو کر ہی نہ اٹھیں یہ ارادہ تو نہیں تھا​
واعظ سے رہ و رسم رہی رند سے صحبت​
فرق ان میں کوئی اتنا زیادہ تو نہیں تھا​
لاہور۔ فروری 83ء​

Faiz Ahmad Faiz-فیض احمد فیض