وہ جس کی دید میں لاکھوں مسرتیں پہناں

​ایک رہگزر پر

وہ جس کی دید میں لاکھوں مسرتیں پہناں

وہ حسن جس کی تمنا میں جنتیں پہناں

ہزار فتنے تہِ پائے ناز، خاک نشیں

ہر اک نگاہِ خمارِ شباب سے رنگیں

شباب جس سے تخیل پہ بجلیاں برسیں

وقار، جس کی رفاقت کو شوخیاں ترسیں

ادائے لغزشِ پا پر قیامتیں قرباں

بیاضِ رخ پہ سحر کی صباحتیں قرباں

سیاہ زلفوں میں وارفتہ نکہتوں کا ہجوم

طویل راتوں کی خوابیدہ راحتوں کا ہجوم

وہ آنکھ جس کے بناو پہ خالق اترائے

زبانِ شعر کی تعریف کرتے شرم آئے

وہ ہونٹ فیض سے جن کے بہارِ لالہ فروش

بہشت و کوثر و تسنیم و سلسبیل بدوش

گداز جسم ، قبا جس پہ سج کے ناز کرے

دراز قد سے سروِ سہی نماز کرے

غرض وہ حسن جو محتاجِ وصف و نام نہیں

وہ حسن جس کا تصور بشر کا کام نہیں

کسی زمانے میں اس رہگزر سے گزرا تھا

بصد غرور و تجمل، ادھر سے گزرا تھا

اور اب یہ رہگزر بھی ہے دلفریب و حسیں

ہے اس کی خاک میں کیف ِ شراب و شعر مکیں

ہوا میں شوخیء رفتار کی ادائیں ہیں

فضا میں نرمیء گفتار کی صدائیں ہیں

غرض وہ حسن اب اس رہ کا جزوِ منظر ہے

نیازِ عشق کو اک سجدہ گہ میسر ہے